KALIBO, Aklan–Nagaeaum si Aklan first district board member Nemesio Neron nga makaangkon it positibong resulta ro ginpatigayon nga legislative inquiry angot sa issue it pabaeay nga proyekto it National Housing Authority.
Suno sa opisyal, bukon it milyon ro nauyang nga kwarta it pumueoyo kundi bilyon kon siin ginakanugunan ro nasambit nga proyekto bangud nga maabo ro abandonado ag bukon it okupado.
Raya hay matapos nga nakit-an ro pila ka mga problema kaparehas ko mga ginabaha ag uwa it eksaktong sewage treatment plant ukon STP.
Nasayuran nga sa napueong ka banwa sa Aklan, may 32 nga proyekto ro NHA nga may kabilugang 10,612 housing units.
Sa nasambit nga numero, 3,976 eon ro okupado it mga benepisyaryo samtang nagapabilin sa 6,636 housing units ro nakatiwangwang ukon uwa naokupahan it mga nakataeana nga benepisyaryo.
Klaro sigon nga pilang porsyento eamang sa proyektong pabaeay it gobyerno ro napanipuslan sa pagtaliwan it mga dinag-on.
Nasayuran nga ro nasambit nga proyekto hay para sa mga apektadong pamilya it bagyong Yolanda ko 2013.
