KALIBO, Aklan—Ginpaeawig pa it daywang dominggo ro lockdown sa nasyon nga Spain.
Raya hay sa tunga gihapon it nagapadayon nga paeag it 2019 coronavirus disease ukon COVID-19 pandemic.
Suno kay Bombo International Correspondent Roland Decena it Barcelona, Spain nga sa ginpatigayon nga session it senado hay ginkasugtanan it mga raya nga paeawigon pa ro naga-iral nga lockdown maskin amat-amat eon nga naganaba ro numero it mga nagapositibo sa COVID-19.
Sa pihak kara, inde maduea kanda ro magkabaeaka sa andang sitwasyon bangud nga uwa eon sanda it trabaho halin kat nagsarado ro andang kumpanya.
Ro promisa it gobyerno nga 70 percent nga ayuda sa andang sweldo hay uwa pa sigon nanda nabaton ag amat-amat eon nga nagakaubos ro andang stock nga mga pagkaon.
Hugot sa gihapon sigon ro paandam it gobyerno nga inde magguwa it tagsa ka panimaeay kon uwa it importante nga ginabakae agud nga inde eon madugangan ro kaso it COVID-19 sa rehiyon.
Sa makaron sigon hay bastante pa ro supply it pagkaon sa Barcelona, Spain ag ro ginaproblema eamang nanda hay kon siin mabueo it inugbakae eabi eon ag ginpaeawig pa it daywang dominggo ro lockdown.
Sa makaron ro Spain hay nagapangaywa sa may pinakamaabong kaso it COVID-19 sa bilog nga kalibutan.
Presenteng nagaabot sa 152, 446 ro infected it COVID-19 kon sa siin sa nasambitang numero hay 15,238 ro namatay samtang 52,165 pa eamang ro nakarecover.
