KALIBO, Aklan–Nagapabilin ro maeamig nga temperatura sa nasyong Espanya.
Bangud kara, ginpahayag ni Bombo International Correspondent Maria Edzel Lamparero Lopez it Spain nga maabu nga mga tawo ro nagamasakit kapareho it trangkaso , allergy, ubo ag sip-on.
Pila man nga mga indibidwal eabi eon ro mga naga-TNT sa nasambit nga nasyon nga owa it baeay nga maistaran ro gina-rescue it gobyerno ag ginadaea sa mga shelter ukon ospital.
Kaeabanan nga naga abot sa negative -2 degree celcius ro temperatura sa Spain rason nga nagakinahangean nga magsuksok it doble nga coat ukon sweater kon nagaguwa dugang pa ro mahaba nga medyas ag kaeo.
Nakasanayan eon sigon it mga pumueuyu nga kon sobrang init ro tiempo hay ginaeauman ro pagtama it heatwave ag kon sobrang eamig hay ro pag angkon it frost.
Sa pihak kara, ginaeauman nga sa katung-anan it marso hay amat-amat eon nga magabaylo ro tiempo halin sa winter paagto sa summer
