KALIBO, Aklan—Nakalista eon ro Spain it kapin sa 4,298 nga kaso it monkeypox.
Ginpahayag ni Bombo International Correspondent Maria Edzel Lamparero Lopez it Madrid, Spain nga 135 sa mga pasyente hay nakaangkon it komplikasyon, 120 ro admitted sa ospital ag daywa ro namatay.
Base sa report, 95 porsyento it mga na-infect it monkeypox hay mga eaeaki nga nakipaghieawas sa kaparehong eaeaki.
Agud nga malikawan ro mas pang pagkalhit it virus, gin-engganyo eon it gobyerno ro mga pumueoyo nga likawan ro pag-adto sa mga sarado nga lugar kapareho it gym ag maskin sa mga swimming pool.
Sa pihak nga parte, ginakabaeak-an makaron sa Espanya ro eapnaag nga pagturok it chemical injection nga may halo nga sangka klase it drugs sa mga party.
Nasayuran nga naga-abot eon sa 35 ro nabiktima halin sa nagkaeain-eain nga parte it kalibutan matapos nga magdayo sa nasambit nga nasyon.
Ro mga biktima hay nakabatyag it pagsakit it ueo, owa it gana maghueag, pagpaminhod it eawas, mataas nga heartbeat ag pagkahilo.
Ro epekto sigon it kemikal hay mabatyagan makataliwan ro 15 minutos matapos raya nga maiturok sa eawas it sangka tawo.
