KALIBO, Aklan–Bangud sa mataas nga inflation, ginpanabaan it gobyerno it Espanya ro income tax it mga indibidwal nga may manaba nga kita.
Suno kay Bombo International Correspondent Maria Edzel Lamparero Lopez it Spain nga mabahoe ro pagpasaeamat kara it mga overseas Filipino workers ukon OFWs sa nasambit nga nasyon.
Tuyo kara it gobyerno nga mabuligan ro mga lower income households nga apektado it pagsirit it presyo it mga nagapangunang baeak-eon ag serbisyo.
Ginpahayag ni Lopez nga nagdesisyon ro gobyerno nga panabaan ro ginabayaran nga buwis it mga indibidwal nga nagakita it kapin sa 21,000 euros ukon katumbas it $20,200 dollars kada dag-on.
Kapareho it Pilipinas suno kana hay padayun man nga nakikipagsukoe ro Espanya sa mataas nga inflation bilang resulta it giyera sa tunga it Russia ag Ukraine kamana man ro uman nga pagbukas it ekonomiya matapos ro mga ginpatuman nga lockdown tuga it pandemya.
Samtang, gindugang pa ni Lopez nga obligado ro mga nagatrabaho idtu nga magbayad it buwis agud nga may benepisyong mabaton halin sa gobyerno sa andang pag-retiro.
Madumduman nga nauna eon nga ginpatuman it Spain bilang bulig sa mga pumueuyu ro libreng public transport, pag-subsidise sa presyo it petrolyo ag temporaryong pagbawas sa sales tax sa gas ag iba pa.
