KALIBO, Aklan—Ginklaro it Department of Social Welfare and Development (DSWD) Region VI nga ro Special Assistance to Individuals in Crisis Situation (AICS) program hay para eamang sa mga lugar nga ginpaidaeom sa Enhanced Community Quarantine (ECQ).
Bangud kara, sa Iloilo city ag Iloilo Province eamang gin-implementar ro nasambit nga programa matapos nga ipaidaeom raya sa ECQ ko Hulyo 16.
Suno kay Ms. May Castillo, tagapaghambae it DSWD-VI nga masobra 75 porsyento eon sigon it ayuda ro andang naipanupod sa mga benepisyaryo.
Suno kay Castillo may una nga masobra daywang million nga benepisyaryo ro programa ukon katumbas it 617,265 nga pamilya ag may pondong masobra daywang bilyong peso.
Kwalipikado sigon nga magbaton it natungdan nga ayuda ro mga nakabuoe it Social Amelioration Program (SAP) 1 ag 2, una sa vulnerable sector ag pamilyang naapektuhan ro paeangitan-an matapos nga ipatuman ro ECQ sa nasambit nga lugar.
Dugang pa kara nga ro distribusyon it ayuda hay magabuhay hasta katapusan it Agosto.
Sa pihak nga parte, nagapadayun man ro pag-arangkada it nagkaeain-eain nga programa it ahensya kaparehas it Social Pension, 4Ps, Sustainable Livelihood Program, Supplementary Feeding Program ag maabo pang iba.
Ginpahayag ni Castillo nga naipadaea eon nanda sa probinsya it Aklan ro kapin sa 22,528 nga family food packs para makaron nga dag-on.
Raya sigon hay nagabalor it P10.9 million.
Samtang, ginapadasigan eon man sigon it ahensya ro distribusyon it Social Pension para sa mga senior citizen agud nga magamit eon ro kwarta para sa andang kinahang-eanon.
