KALIBO, Aklan—Ginsug-aeaw it hub-eag protesta sa Sri Lankan President Gotabaya Rajapaksa matapos raya nga magpaeagyo ag mag-agto sa Maldives.
May daea nga mga bandera ag placards ro mga expatriates nga mga Sri Lankan ag ginapalayas sa Maldives si Rajapaksa.
Gin engganyo it mga protesters ro gobyerno it Maldives nga palayason ro pangueo it Sri Lanka.
Insigida man nga nabaeabagan it mga kapulisan sa Maldives ro mga protesters nga makapaeapit kay Rajapaksa.
Ginaeauman nga maga-agto sa United Arab Emirates ukon sa Singapore ro Sri Lankan president.
Madumduman nga nagpaeagyo sakay it military jet si Rajapaksa kaibahan ro anang asawa matapos ro pagtuhaw it hub-eag protesta bangud sa padayun nga krisis sa ekonomiya.
Sa pihak nga parte, ginpahayag ni Bombo International Correspondent Christina Sorongon nga masyadong malisod makaron ro sitwasyon sa Sri Lanka kun sa siin mas grabe pa ko tiempo nga nakaangkon it lockdown tuga it covid 19.
Mabudlay suno kana ro pagbakae it mga pagkaon tuga it kakueangan it public transportation bangud sa kawad-an it mabakae nga produktong petrolyo ag masyadong mahae ro mga baligya.
Maeapnagon man suno kana ro power interruption.
Samtang, ginpahayag dugang nga maabu nga mga Pilipino ro gustong mag-uli.
Ginpromisa man sigon it gobyerno it Pilipinas nga ro indi mag-avail it repatriation hay makabaton it ayuda nga 300 dollars apang hasta sa makaron hay owa pa raya nataw-an it katumanan.
