KALIBO, Aklan—Gin-abisuhan it Social Security System ukon SSS ro andang mga miyembro nga pwede eon nga obrahon ro tanan nga transaksyon sa halin sa pagbo-oe it benepisyo ag paghueog it kontribusyon pinaagi sa online.
Suno kay Rene Moises Gonzales, branch manager it SSS-Aklan nga raya hay sangka digital service it andang taeatapan.
Tuyo kara nga indi eon mag agto it personal ro mga miyembro sa andang opisina eabi eon makaron nga may pandemya it COVID-19 para sa mas eowas nga pakikipagtransaksiyon.
Sa pihak kara, padayon sanda nga nagabaton it over-the-counter nga transaction kapareho it mga nagabayad it andang contribution.
Apang sa ibang transaksyon hay limitado ag nagakinahangean it number coding.
Gindugang pa ni Gonzales nga pwede man nga gamiton ro online service sa pagsumite it mga requirements sa pagbo-oe it benepisyo sa unemployment, sickness, funeral ag maskin sa salary loans ag calamity loans.
Kamana man ro pagpadaea it maternity notification sa mga nabdos nga miyembro ag pati ro sickness notification it mga nagmasakit.
Makabenepisyo man sigon kara ro mga miyembro nga pensiyonado, pati eon ro mga OFW.
Sa online system suno kana hay pwede eon nga makahimo it pilang minor nga corrections it mga datus it miyembro.
Dapat sigon nga mag-log anay sa www.sss.gov.ph para maidownload sa kaugalingon nga cellphone ro SSS Mobile App kun sa siin pwede eon nga makapag-transaksyon.
