Kalibo Aklan ———–Ginkumpirma ni Fr. Tudd Belandres, kora paroko it St. John The Baptist Cathedral nga sambilog sa tatlong nagpositibo sa 2019 coronavirus disease (COVID-19) hay lay minister it nasambitang simbahan.
May kaangtanan kara, ginakasubo sigon it pamunuan it simbahan ro nasambitang balita kon sa siin ro ulihing serbe kara hay ko March 15, 2020 alas-7:00 ro oras.
Ginpahayag dugang nga uwa sigon it kasayuran ro tag-eawas nga may ana nga nasambitang sakit hasta ko nagtaliwan nga adlaw it Biyernes, Marso 27 hay nagguwa ro confirmatory result it anang specimen sample nga nagpositibo sa COVID-19 pandemic.
Una kara, nakaserbe eon sa simbahan ro lay minister antes nga gin-confine sa ospital bangud nga may ana nga pneumonia.
Ginklaro man ni Fr. Belandres nga uwa pa nanda nasayuran ro balita hay nakadis-infect eagi sanda it simbahan matapos it nasambitang misa kon sa siin ro lay minister hay nagpakalawat sa mga nag-atendir it misa.
Suno pa kay Fr. Belandres, ro bilog nga pamilya it lay minister hay nagaserbe man sa simbahan apang naka-quarantine eon sanda makaron halin kat nasayuran nga nagpositibo raya sa virus.
Sa pihak kara, nagpanawagan si Fr. Belandres sa mga nakasalamuha it nasambitang lay minister nga mag self quarantine para eon man sa kaeowasan it tanan.
Samtang sa pihak nga parte, ginpahayag dugang nga maski uwa it presensya it mga tumueo-o ag parishioners hay magapadayon ro simbahang katolika sa mga aktibidad it simbahan kaangot sa nagahilapit nga pagdumdom it semana santa.
May kaangtanan kara, anang gin-engganyo ro tanan nga mga pumueoyo nga padayunon ro paghimo it lukay para sa dominggo de ramos maskin nga inde ro mga raya personal nga makaadto it simbahan.
Ro himuon eamang sigon it mga tumueo-o hay magpamantaw sa andang TV ukon magpamati sa radyo kon sa siin may live coverage it misa ag iwagayway ro mga lukay kon oras eon raya nga benditahan.
Ginpahayag dugang nga magapadayon ro tanan nga aktibidad it simbahan maskin nga una sa Enhanced Community Quarantine ro banwa it Kalibo ag bilog nga probinsya it Aklan.
Samtang, ginpadumdom ni Fr. Belandres ro tanan nga kon nagasimba sa tv ukon radyo hay himuon raya nga balaan pinaagi sa pagta-o it importansya ag magpokus.
Inde anay sigon mag-istorya ukon maghimo it mga o-eobrahon sa baeay bangud nga kaparehas man raya it sa simbahan nga nagatutok ka sa misa sa sueod it sang oras.
