KALIBO, Aklan—Preparado eon ro pamunuan it St. John The Baptist Cathedral para sa mga aktibidad it simbahan sa kaadlawan it kapiestahan ni Sto. Niño de Kalibo hin-aga nga adlaw it domingo sa atubang it nagapadayun nga COVID-19 pandemic.
Suno kay Fr. Tudd Belandres, kora paroko it nasambit nga simbahan nga pagahiwaton ro naka-andan nga Pilgrims Mass bandang alas-7 it agahon ag pagasundan it grand procession.
Ro pagbayaw hay pagapangunahan gihapon ni Kalibo Mayor Emerson Lachica samtang ro mga magapatik hay ginbutang eon sa guwa eon it simbahan.
Nag apela imaw nga pito hasta napueo eamang nga drummers ro magsunod sa procession mag-eowas kon mabahoe ro andang saeakyan nga magalibot sa mga nagapangunang kalye sa banwa it Kalibo.
Gina-engganyo ni Fr. Tudd ro tanan nga mga nagasimba nga hugut nga magsunod sa ginapatuman nga health protocol.
Nagbutang sigon sanda it mga physical distancing marker sa saeog kun sa siin magatindog ro mga nagasimba sa guwa it simbahan hasta sa sueod it kalibo pastrana park agud nga malikawan ro pag-ililiping.
Kon makabatyag sigon it sintomas it COVID-19 ag bukon it fully vaccinated hay mas mayad nga magpabilin anay sa sueod it baeay ag magbantay sa coverage it bombo kalibo ag mga cable TV.
Limitado eamang sa 250 hasta 300 nga katawo ro ginapasugtan nga magsueod sa simbahan.
Samtang, gindugang pa ni Fr. Tudd nga nagpadayun kaina it agahon ro andang ikaywang grand caravan procession kun sa siin maabu nga mga deboto ro nagsunod.
Sa pihak nga parte, gindugang pa ni Fr. Tudd magiging maeawig ro pagalibutan it andang grand parade nga maga-umpisa alas-3 sa hapon it domingo.
