KALIBO, Aklan–Agud nga malikawan ro pagtaas it numero it mga kaso it COVID 19, ginpakamayad it St. Jude Thaddeus Church nga limitahan ro mga aktibidad para sa semana santa.
Suno kay Rev. Fr. Jeffrey Jimenez, Parish Moderator it nasambit nga simbahan nga magapatuman sanda it pilang restriction sa pagdumdum it Holy Week umpisa sa Marso 28 hasta sa Abril 4.
Suspendido anay sigon ro procession para sa Palm Sunday ukon Domingo de Ramos sa March 28 ag Easter Sunday ukon Paskwa it Uman nga pagkabuhi.
Apang magapadayun ro pagbendisyon it mga lukay.
Bangud nga limitado eamang sigon sa 50 porsiyento it kapasidad it simbahan ro ginapasugtan nga makasueod, may mga gintaeana nga chapel agud nga hiwatan it mga aktibidad sa domingo de ramos.
Umpisa sa lunes hasta biyernes santo hay may ginapatigayon nga “via crucis in times of pandemic” sandig sa mandu it Catholic Bishop Conference of the Philippines ukon CBCP.
Sa holy Thursday hay may renewal of vows sigon ro mga kaparian it diocese of kalibo sa Obispo nga pagahiwaton sa St. John the Baptist Cathedral.
Kaeakip ro pagbendisyon it holy oil ag iba pang aktibidad.
Samtang, bangud nga bawae ro public gathering, iga-cover live it mga radio stations ro andang siete palabras ukon 7 last words sa Biyernes Santo.
Nagapati si Fr. Jimenez nga ro pagtama it pandemya nga daea it covid 19 hay makabig nga wake-up call sa mga tawo sa mga saea nga gin-obra.
Sa semana santa sigon hay ginakilaea kara ro hinimuan it Diyos sa sangkatawuhan.
