KALIBO, Aklan—Nagapabiling “mixed emotion” sa pangaywang adlaw it Boracay soft opening ro mga miyembro it Compliant Association of Boracay (CAB) nga nag-umpisa kahapon.
Sa interview it Bombo Radyo, ginpahayag ni CAB Vice President Boyet Sacdalan nga hasta sa makaron hay inde nanda mapaathag ro andang baeatyagon kat makit-an ro pagbuhos it mga tawong gustong makit-an it uman ro kaanyag it sikat nga Isla matapos ro an-om nga bueang pagpasarado kara sa mga turista ag bakasyunita ko Abril 26 agud taw-an it daean ro ginpatigayong rehabilitasyon.
Dugang pa kara nga eubus ro andang pagpasaeamat ag kalipay sa nakit-ang development matapos ro mala-trahedyang natabo sa Boracay bangud sa waea-tuo nga demolisyon it mga istraktura ag kabaeayan; rehabilitasyon it mga karsada; pagkadiskubre it mga maeagkong tubo nga nagapaguwa it higko sa dagat; ag maabong iba pa.
Samtang, gindayaw kara ro ginhimong aksiyon it gobyerno pamaagi sa pagbilog it Inter-agency task force nga ginakaeakipan it Department of Tourism (Dot), Department of Environment and Natural Resources (DENR) ag Department of Interior and Local Government (DILG).
