KALIBO, Aklan—Plano makaron it Stall Owners and Vendors Association sa Kalibo Public Market nga magpadaea it letter of appeal sa Sangguniang Bayan it Kalibo angot sa pagtao it discount sa monthly rental it mga stall owners.
Suno kay Stall Owners and Vendors Association President Danny Lopez nga sa maabot nga adlaw it Lunes hay pagatinguhaan nandang maipaabot ro andang sueat agud nga maka hingabot sa session it Sangguniang Bayan.
Sambilog sigon sa andang ginasuhestiyon hay ro pagtao it lokal nga gobyerno it kapin sa 30 hasta 40 porsyento nga discount sa mga stall owners samtang owa pa nakabalik sa new normal ro sitwasyon tuga it pandemya.
Suno kana, makabulig raya sa mga stall owners nga nabudlayan sa pagbayad it andang monthly rentals bangud sa kawad-an it kita kamana man nga malikawan ro pagsarado it andang pwesto.
Nagaeaum si Lopez nga mapasugtan it Sangguniang Bayan ro andang apela.
Madumduman nga nagtapos eon ko Hunyo 30 ro extension sa pagbayad it stall rentals nga owa it ginapasaka nga surcharge ukon interes rason nga umpisa makaron nga buean it Hulyo hay magabalik eon kada petsa 20 ro pagbayad it bueanan nga renta.
