KALIBO, Aklan — Agaw-atensyon ag uman nga nabuhi ro handumanan it naeumos nga si Jhorus Flores sa ginpatigayon nga moving up ceremony matapos daehon it anang mga ginikanan ro anang standee sa nasambit nga okasyon sa banwa it Banga, adlaw it Lunes, Abril 14, 2025.
Madumduman nga si Jhuros hay naeumos sa Aklan River nga sakop it Brgy. Polo, Banga ko nagtaliwan nga Enero 29 it makaron nga dag-on matapos nga magsaeampitan ro anang mga kaklase ag iba pang amigo nga magpaligos sa nasambit nga suba.
Agud nga mabatyagan nga kaibahan imaw sa mga nagtapos it Grade 10 sa Bacan National High School hay ginbutangan man it stole ro anang standee.
Maskin sa class pictorial ag groufie sa ibabaw it stage ag maskin siin man hay bitbit ro anang standee it anang mga mga kaklase.
Nagtambong sa seremonya ro anang ina nga si Rosebelle Flores nga uman nga naging emosyunal matapos nga makita ro mga kaklase it anang panganay nga unga nga si Jhuros.
Batyag gihapon it pamilya ro kasubo bangud nga hasta sa makaron hay owa gid nakita ro eawas it binatilyo.
Nauna eon nanda nga ginpahayag nga maskin nga masakit kanda ro gindangatan it anang unga, apang pilit sanda nga nagapakatatag agud nga magpadayun sa normal nga pagpangabuhi.
Naghimo it kasaysayan ro pagkaduea it binatilyo bangud sa unang kahigayunan hay nagtingob it pwersa ro mga emergency responders it nagkaeain-eain nga Municipal Disaster Risk Reduction Management Council sa bilog nga probinsiya it Aklan, mga volunteers ag professional divers halin sa Isla it Boracay ag iba pang mga probinsiya para sa maeapnagon nga search and retrieval operation.
Mag-eowas kara, nagbueuligan man maskin ro mga sikat nga albularyo sa Aklan ag kaiping nga probinsiya nga nagpatigayon it kanya-kanya nga ritwal ukon tawas agud nga mausoy ro ginakahimtangan it binatilyo, apang puro napaseawan.
Kaibahan kara ro celebrity psychic nga si Jay Costura, Ed Caluag ag iba pa.
