Kalibo Aklan ——-Posibleng magapabilin hasta sa Mayo 31 ro stay-at-home order sa Washington USA, apang ro pilang restrictions hay ginaeuman nga pagahaeugaan sa katung-anan it makaron nga buean .
Suno kay Bombo International Correspondent Maria Fe Pamatian , tubong Brgy. Ugsod, Banga ag sangka frontliner sa Seattle nga masobra sa 840 eon ro namatay sa nasambit nga estado it Amerika sa kabilugan nga masobra sa 15,400 nga nailistang kaso .
Ginpahayag dugang nga kapin sa 216,320 nga katawo sa Washington ro ginpaidaeum sa test para sa coronavirus ag 7.1% sa mga raya ro nag-positibo sa sakit .
Ginatos eon man suno kana nga mga health care workers ag mga first responders sa Washington state ro nakaangkon it COVID- 19 samtang nagatuman sa andang trabaho .
Maskin suno kana imaw hay nakaexperiensiya man nga ma-praning matapos nga makaangkon it eagnat ag nagsakit ro tutunlan matapos nga ma-assign sa ward it andang ospital nga ro sueod hay puro mga COVID patients .
Apang sa kaeo-oy it Diyos hay nag-negatibo sigon imaw sa nasambit nga sakit rason nga uman nga nakabalik sa trababo matapos ro daywang domingo nga quarantine .
Nagaduda suno kana imaw nga ro anang nabatyagan kat magkasakit hay sintomas it COVID apang natigayon nana raya nga maeampasan bangud sa mabaskog nga immune system .
Sa Washington State suno kana hay hugut nga ginasunod it mga pumueuyu ro pagtinir sa sueod it baeay, social distancing ag pagsuksok it face mask rason nga manaba ro kaso kumpara sa New York City nga maabu ro matig-a it ueo.
Mataeupangdan pa suno kana nga mas instrikto ro mga Asian stores kumpara sa American stores sa andang disinfecting facility equipment.
Sa pihak nga parte, padayun sigon ro imbestigasyon makaron it US government kon man-made halin sa laboratoryo it China ro nagkalhit nga virus.
