Kalibo Aklan ———Ginareklamo makarun it mga manugtaya ro Small Town Lottery (STL) sa banwa it Kalibo matapos ro kontrobersiyal nga pagkaltas it 50 percent sa andang nadag-an nga premyo sa ginpatigayon nga 1st draw kahapon nga adlaw bandang alas 3:00 sa hapon .
Suno sa sangka manugtaya nga si Peter Masungsong nga eubos ro anang pagkadismaya matapos nga buhinan it katunga ro anang premyo.
Nasayuran nga si Masungsong hay nagtaya it 25 pesos ag nakataeana nga makabatun kungta it premyo nga kapin sa 17,500, apang 8,750 eamang ro ginrelease kana.
Bangud sa nasambitan nga hitabo hay nagpaabot man raya it anang kaeain it boot sa pamunuan it STL ag nagpromisa nga indi eun magtaya pa it uman.
Samtang sa pihak nga parte ginpahayag man ni Elmer De Dios , ro table manager it (STL) sa banwa it Kalibo nga sandig sa andang pagsinueondan hay may una eamang sandang dividendo nga kapin sa 2 millon pesos.
Ro natabo sigon kahapon hay ro pinakaunang kahigayunan kung sa siin 46 tanan nga mga manugtaya ro nagdaog it numero ukon katumbas it kapin sa 6 million pesos nga nadag-an it mga manugtaya sa bilog nga probinsya it Aklan.
Nasayuran nga gindagsa it mga manugtaya kahapon ro numero nga 01;06 , kung sa siin raya man ro buean ag petsa sa mismong adlaw nga nagserbing lucky numbers sa kaabuan matapos nga magguwa sa 1st draw it STL.
