Ginpahayag it Department of Energy (DOE) nga sangkiri nga nagnana ro fuel inventory it Pilipinas halin ko nagtaliwan nga domingo, apang nagapabilin raya nga stable ag bukon it maka-alarma sa pihak it padayun nga pagbag-o sa pangkalibutanon nga merkado it langis.
Suno kay Energy Secretary Sharon Garin, bastante ro kabilugan nga fuel stock it nasyon it hasta sa 45.33 days base sa presenteng konsumo ko Mayo 15.
Ginaboeobanta nga kapin sa 78,080.13 liters ro average nga pang-adlaw-adlaw nga demand it nasyon sa fuel.
Dugang pa nana nga maskin sensitibo gihapon ro global oil prices bangud sa pabago-bag-ong demand forecasts, geopolitical tensions, ag production adjustments it mga mabahoe nga exporters, nagapabilin nga mabakod ro international supply chains nga ginahalinan it suplay it Pilipinas.
Sa pihak it sangkiri nga pagnaba it imbentaryo, ginpasiguro ni Garin nga hugut nga gino-monitor it DOE ro supply ag haum raya nga maghueag kun maganaba ro ginatawag nga comfortable levels ro stock.
Base sa datos it DOE, ro presenteng supply coverage hay 46.85 days para sa gasolina, 45 diyas para sa diesel, 50.14 days para sa fuel oil, 152.12 days para sa kerosene, 30.21 days para sa liquefied petroleum gas, ag 59.74 days para sa jet fuel.
Pauman-uman eon nga ginpasiguro it gobyerno nga bastante ro fuel reserves it nasyon sa pihak it pagbag-o-bag-o nga presyo it langis ag ro mga pagkabaeaka sa supply.
