NATIONAL News — Napilitan ro mga tindera sa Baguio City Public Market nga ibagsak ro presyo it mga strawberry bangud sa sobra-sobrang suplay kara.
Madumduman nga ko tiempo it Panagbenga ko buean it Pebrero hasta Marso, mabakae ro mga strawberry sa P100 kada pakete nga may bug-at nga 100 gramo.
Pagkataliwan it sang buean, ginabaligya eon lang ro mga strawberry sa balor nga P40 kada pakete, mas manaba sa presyo kara ko nagtaliwan nga buean.
Nagabalor it P200 ro pinakamahae nga kada kilo it strawberry ag P150 man ro pinakabarato.
Suno sa mga tindera, indi man gid sanda malugi ag gusto eamang nanda nga mabakae eagi ro mga raya agud nga indi masamad.
Maabu ro suplay bangud nga tiempo makaron it anihan. Ro mga strawberry hay nagahalin sa nagkaeain-eain nga parte it Benguet kapareho it La Trinidad ag Kibungan.
Ginabaligya man sa balor nga P30 pesos ro mga reject nga strawberry ukon ro pwedeng obrahon nga jam.
