KALIBO, Aklan—Nagtuga it pagkaeabaka sa mga pumueoyo it Brgy. Napti, Batan ro pag-positibo sa Coronavirus Disease 2019 ukon COVID-19 it sangka 39-anyos nga eaeaking OFW ag negosyante ag residente man it lugar.
Suno kay Punong Barangay Eugine Penalba, nagpatuman it paghugut sa quarantine protocol ro andang barangay matapos nga ipaidaeom sa “strict granular lockdown” sa sueod it limang adlaw ro Sitio Centro umpisa Agosto 30 hasta Setyembre 3, 2020.
Raya hay para malikawan ro posibleng pagkalhit it nasambitang sakit.
Suno kay kapitan, naalarma sigon sanda matapos nga magtawag ro Rural Health Unit (RHU) Batan nga nagpositibo sa makataeapon nga sakit ro pasyente.
Kasunod kara, gin-adtunan sigon nanda sa andang panimaeay ro pasyente para impormahan ag para i-hold ro anang pamilya kamana man nga andang gin-abisuhan ro mga tawo maeapit sa lugar nga indi anay magguwa.
Ginapahayag nga raya ro pinakaunang nailistang kaso it COVID-19 it andang barangay ag kabilugan nga banwa it Batan.
Angot kara, presente sigon nga may nakataeana nga checkpoint sa tanan nga boundary paadto sa lugar.
Nag-isyu eon man sigon sanda it sambilog nga quarantine pass sa kada house kung sa siin sang beses eamang sa sueod it sang adlaw ginapasugtan ro mga raya nga makaguwa para magbakae it anumang kinahang-eanon.
Samtang, naka-isolate eon man makarun sa Aklan Training Center Quarantine Facility ro nasambitang pasyente.
Matueopangdan nga nakalista it 22 ka mga high risk contacts it pasyente sa ginpatigayun nga contact tracing kamana man nga temporaryo nga ginsarado ro RHU-Batan matapos kara nga makasalamuha ro waeo ka mga staff it pasilidad.
