KALIBO, Aklan—Ginpaathag it lokal nga gobyerno it Aklan nga kinahang-ean gihapon ro strikto nga pagsunod it publiko sa minimum health and safety protocols apisar nga ginpaidaeom eon sa Alert level 1 status ukon new normal ro bilog nga probinsya umpisa hin-aga.
Nakabaehag sa ginpagguwa nga panibag-ong Executive Order ni Aklan Governor Florencio Miraflores nga pagabue-on eon ro curfew hour.
Mag-eowas kara, igapatuman man ro 100 percent seating capacity sa mga pampublikong transportasyon ag 24/7 nga operasyon it mga negosyo.
Ginpahayag ni Provincial Administrator Atty. Selwyn Ibarreta nga kinahang-ean gihapon nga magsuksok it face mask ag mag-obserba it physical distancing ro mga pumueoyo eabi eon kun naga-adto sa mga matawo nga lugar.
Nagaeaum si Ibarreta nga magdire-diretso eon ro paghaeuga ag amat-amat nga pagduea it mga restriction agud nga makabalik eon sa normal nga pagpangabuhi ro mga pumueoyo.
Nag-apela man raya sa publiko nga indi maging kampante ag magpabilin nga responsable sa pihak it mga paghaeuga.
