Ginserbi it mga tawuhan it PNP – Criminal Investigation and Detection Group (CIDG) sa Senado ro subpoena para kay Senador Ronald “Bato” dela Rosa, agahon it Lunes, May 11.
Ginpahayag ni Police Capt. Larry Rey, sangka chief investigator sa PNP-CIDG, nga nagpamalibad ro staff ni dela Rosa nga batunon ro subpoena.
Ginrason it staff it senador nga owa it mandu kanda ro senador angot sa subpoena.
Apang ginpahayag ni Rey nga maikonsidera eon nga naisirbi ro subpoena bangud nga gin-aywan nanda raya sa taeatapan it senador.
Mag-eowas sa anang opisina, nag-agto man ro mga personnel it PNP-CIDG sa baeay ni dela Rosa sa Davao City makaron nga adlaw it Lunes.
Ginserbe nanda ro subpoena agud taw-an it kahigayunan ro senador nga magpaathag.
Madumduman nga nagserbe bilang hepe it PNP si Sen. Bato sa kasagsagan it war on drugs.
Nauna eon nga gin-anunsyo ni Interior Sec. Jonvic Remulla nga ro subpoena kay dela Rosa hay paghinyu it kooperasyon it senador sa pag-imbestiga sa gina-alegar nga “extra judicial killings,” kadungan it kampanya kontra droga it nagtaliwan nga administrasyon.
Mag-eowas kay dating Pangueong Rodrigo Duterte, kaibahan man sa mga ginpasakaan it kasong crimes against humanity sa International Criminal Court (ICC) si dela Rosa.
Owa eon raya nagsueod sa Senado umpisa ko nagtaliwan nga Nobyembre 10 ag raya ro ugat it ethics complaint kontra kana sa Senate Ethics Committee.
