Plano it House prosecution panel nga maghinyu it subpoena para kay Vice President Sara Duterte apang sa tiempo nga matapos eon kara nga maiprisenta ro tanan nga ap-at nga artikulo it impeachment.
Raya ro ginpahayag ni Lead Private Prosecutor Atty. Lorna Kapunan sa pag-umpisa it ika-23 nga adlaw it pagbista, adlaw it Martes, Setyembre 8.
Suno kay Kapunan, indi pa nanda pagahinyuon ro insigidang pagpaguwa it subpoena sa makaron bangud nga nakatutok anay sanda sa pagplastar it ebidensya ag ro pag-atubang kay VP Duterte hay paga-obrahon sa punta it proseso.
Gin-engganyo ni Kapunan si VP Duterte nga mag-atubang, respetuhon ro proseso it impeachment, ag pamatud-an ro anang gina-insister nga owa imaw it saea.
Kadungan kara, ginpahayag man it panel ro desisyong nga indi eon pagpadayunon ro nabilin nga 15 sa orihinal nga 27 testigo para sa Article I ukon saea nga paggamit it mga confidential fund matapos ro andang mahabang diskusyon.
Sa 27 testigo nga ginbutang it prosekusyon sa andang pre trial brief hay 10 ro andang gin-atubang nga testigo sa trial.
Kaibahan sa mga indi eon maga-atubang sanday Police Major Jovelyn Magay, Sunshine Fajarda, ag Bresilio Sabaldan. Bangud kara, opisyal eon nga gintapos it prosekusyon ro andang argumento para sa nasambit nga artikulo apang may una raya nga reservation para sa pagpatawag pa sa daywang testigo kun kinahangeanon pa.
Ginpaathag ni Kapunan nga ro andang desisyon nga indi eon iprisinta ro iba pang testigo hay bangud man nga klaru eon sa mga naunang testigo nga sambilog eamang ro andang ginaturo ag raya hay si VP Duterte.
Ginhalimbawa ni Kapunan ro mga naunang testigo sa mga piyesa sa chess nga nagaturo sa sangka tawo, ro bise presidente, bilang nagapangunang may saeabton.
Matapos ro Article I sa confidential funds, sunod nga igaplastar it prosekusyon ro mga alegasyon sa unexplained wealth (Article II) ag kasunud ro bribery (Article III).
