KALIBO, Aklan—Patay ro sangka Sudanese national matapos nga gin-atake sa tagpusuon sa sueod it anang baeay sa Barangay New Buswang, Kalibo, Aklan.
Ginkilaea ro dumueoong nga si Gamal Aamed El Nigomi, 55, sangka Muslim, tubong Sudan apang presenteng naga-istar sa nasambitang lugar.
Bilang paunang medikasyon, ginbira sigon it pilang kaeapit-baeay kara ro kinatawo it eaeaki apang sa uwa it swerte hay ginbawian man imaw it hueam nga kinabuhi.
Insigida man raya nga gin-eobong it anang mga kaibahan base sa tradisyon it mga Muslim, kon siin, ro anang patay nga eawas hay ginpaligsan antes nga ginputos sa puti nga tela nga ginatawag nga “kafan”.
Nasayuran nga nakilaea si Gamal sa anang pagmaneho it pampasaherong van biyaheng Kalibo-Caticlan ag sa probinsya it Aklan eon man naka-asawa it Pinay nga Muslim.
