Maabu eon ro na-adik, naeubong sa utang , nakaka-obra it krimen hasta nga nagpakamatay bangud sa sugae.
Sa kasagsagan it pandemya maabu ro na-adik sa online sabong.
Bagay nga makangawa-ngawa.
Owa it trabaho apang nakakahimo it pamaagi agud nga may maipang-taya.
Hasta nga mas pang nag-eapad ro operasyon ag mas nga nag abu ro mga na-adik.
Kasunod kara ro mga report it pagkaduea it mga sabungero ag ahente nga hasta sa makaron hay owa pa nakit-an.
Matapos maimbestigahan sa Senado ag sa rekomendasyon it Department of the Interior and Local Government, eubusan eon nga ginpapundo ni Pangueong Rodrigo Duterte ro operasyon it e-sabong.
Nagpaandan man ro DILG sa mga maga-eabag sa suspensiyon nga posibleng maaresto ag makasuhan sa korte.
Kadungan ro pahayag nga puwedeng bumalik sa traditional sabong nga ginapasugtan sa idaeum it Alert Level 1, kinahangean eamang it permit halin sa local government unit (LGU).
Samtang, naga abot sigon sa P5 bilyon hasta P6 bilyon pesos ro kantidad it kitang maduea sa nasyon makaron nga dag-on matapos nga eubusan eon nga ginpapundo ro e-sabong.
Suno sa Philippine Amusement and Gaming Corporation (Pagcor), sa makaron nga dag-on hay ginaeauman nga kapin sa P50 bilyon hasta P60 bilyon pesos eamang ro gross gaming revenue nga mabo-oe it gobyerno halin sa dating P60 bilyon hasta P65 bilyon pesos nga estimated revenues kara.
Nasayuran naton nga mabahoe raya nga kantidad nga pwede kunta nga magamit sa mga programa ag proyekto it gobyerno.
Ro problema, kun indi man makontrol ro mga sugaroe, bilog nga nasyon man ro maga-antus.
Halin sa pamilya, kon may sangka adik sa sugae, nahimo eon nga mag-utang hasta nga kumapit sa patalim ag indi eon makapag-isip it matino.
Apektado ro bilog nga pamilya ag ro masubo pa, daeahig pati ro ibang tawo nga sa palibot.
Ro anuman nga sobra hay maeain.
Kon may mga bagay nga indi eon naton makontrol, tiempo eon agud nga magpundo ag intindihon ro sitwasyon.
