KALIBO, Aklan—Sumabog ro makabig nga sambilog sa aktibong bulkan sa may isla it Kyushu, Japan ko nagtaliwan nga Dominggo pasado alas-8 it gabi-e.
Suno kay Bombo International Correspondent Josel Palma it Japan nga ro bulkang Sakurajima hay nagbuga it mga abu ag bato sa kaeayuon nga 2.5 kilometers maghalin sa bulkan.
Sa pangaywang kahigayunan ginpasaka sigon sa pinakamataas nga alert level ro nasambit nga lugar kung siin maghalin sa alert level 3 gilayon nga ginpasaka ra sa alert level 5.
Gin-eaygayan man it Japan government ro mga residente sa nasambit nga lugar nga magbakwit bangud sa delikado ro mga ginabuga it nagsabog nga bulkan.
Samtang, ro Sakurajima hay sambilog sa aktibong bulkan sa Japan ag pilang beses eon man rayang sumabog nga ro pinaka-ulihi hay ko nagtaliwan nga dag-ong 2019 nga nagbuga it abu nga umabot sa kapin 5.5 kilometers.
Sa makaron,padayon pa ro ginapatigayon nga imbestigasyon it Japan government angot sa naging kabilugang danyos it pagsabog it nasambit nga bulkan.
