NEW WASHINGTON, Aklan—Nagapabilin nga paealigban sa sangka pamilya ro misteryoso ag sunud-sunod nga pagkapatay it andang mga alagang pato ag pabo sa Brgy. Candelaria, New Washington.
Suno kay Benjamin Flores, caretaker it mga kasapatan ag igmanghud it tag-ana kara nga si punong barangay Violene Flores Ismael nga kabilugan nga 19 nga pato ag 15 nga pabo ro namatay nanda nga alaga.
Mabahoe ro andang pagpati nga posibleng bangud sa gintau nga damog it sangka carinderia ro naging rason it pagkamatay it andang alaga.
Personal sigon nga gin-offer kana it tag-ana it carinderia ro mga damog nga ana man nga ginbaton.
Sa unang domingo it andang pagsabod kara hay owa man sigon sanda it nataeupangdan nga maeain sa andang mga alaga, apang makataliwan ro daywa hasta tatlong domingo hay nakita nanda ro sambilog sa andang pabo nga nag-euya ag nagapangisay.
Pagkatapos kara hay naging sunud-sunod eon ro pagkamatay it andang mga kasapatan sa sueod it kulungan.
Sa pihak nga parte, eubus ro pagkanugon ni punong barangay Ismael sa pagkamatay it andang mga kasapatan nga ginpaalagaan sigon it anang anang unga nga nagatrabaho bilang seaman.
May posibilidad man sigon nga inagyan it “atay” ro anang mga alaga.
Apang misteryoso sigon ro natabu bangud nga gulpiyada ro andang pagkamatay ag owa nakitaan it pag-euya ukon pagmasakit ro andang mga alaga.
