KALIBO, Aklan—Ginatantiya nga 400,000 pesos ro inisyal nga danyos it sunog nga umugdaw sa sangka building bandang 5:30 kahapon it hapon sa Dr. Gonzalez Street corner Pastrana Street Poblacion Kalibo.
Suno kay Fire Senior Inspector Joseph Cadag it Bureau of Fire Protection (BFP) Kalibo nga umabot it ikaywang alarma ro nasambit nga sunog nga gin-respondehan it mga bumbero maghalin sa numancia ag new washington fire station.
Bandang alas-6 it gabi-i hay kontrollado eon ro kaeayo ag pag-abot it alas 6:26 hay gindeklarang fire out.
Ginapatihan nga nag ugat sa faulty electrical wiring ro insidente.
Base sa andang arson investigator, samtang nagahampang it computer games ro daywang ka unga it naga-board sa nasambit nga building , napan-uhan nanda ro asu halin sa kwarto it caretaker nga si Mary Ann Danieles rason nga insigidang nagpangaeayo it bulig.
Ro building suno kana hay haeos 30 anyos , kun sa siin boarding house sa likod ag sa prente hay beauty parlor.
Sambilog ro naninahan sa insidente, apang matapos nga mabueong ro anang ankle injury hay gin-refer raya sa out patient department.
Raya ro kauna-unahan nga insidente it sunog makaron nga 2021 sa banwa it Kalibo.
