KALIBO, Aklan–Indi pa matumod ro rason it sunog nga nagtuhaw sa Aklan Mission Hospital kaina it agahon sa Barangay Andagao, Kalibo.
Suno kay FO1 Janryl Magno it Bureau of Fire Protection ukon BFP-Kalibo nga magapatigayon pa it pag-usisa ro mga engineer ag electrician it ospital para sa kumpleto ag komprehensibong assessment sa kahalitan it sunog partikular sa generator room kara.
Suno sa BFP nga nag-umpisa ro sunog sa generator room nga nahamtang sa ground floor.
Sangka Jovelyn Arriola nga naka-assign sa kitchen department ro unang nakataeupangod sa insidente.
Nagtuhaw ro sunog bandang alas-5:40 it aga-aga ag natigayon man eagi nga nakontrol.
Bandang alas-5:43 hay eubusan nga napatay ro kaeayo.
Gindugang pa ni FO1 Magno nga naging madinaeag-on ro staff it hospital sa paggamit it andang natun-an sa fire drill.
Haeos napueong fire extinguisher sigon ro andang naubos rason nga owa eon nagkalhit ro kaeayo sa iba pang parte it edipisyo.
Naga-abot sa P100,000 pesos ro inisyal nga naging danyos it sunog apang posible pang magtaas depende sa resulta it imbestigasyon.
Ginasugid nga natabu ro sunog matapos ro naexperiensiyahan nga power interruption, kun sa siin ginasugid nga automatic raya nga naga-andar.
Ro generator set hay ginbakae kadungan it pagtukod it ospital may 25 anyos eon ro nagtaliwan.
Sa pihak nga parte, nagbalik man eagi sa normal nga operasyon ro ospital kun sa siin nakabalik eon ro mga displaced patients ukon ginbakwit nga mga pasyente sa andang natungdan nga mga kwarto ag ward.
Naresponde sa insidente ro mga katapo it Kalibo PNP, MDRRMO ag iba pang rescuers ag fire volunteers.
