Natigayon nga naugdaw it nag-eontad nga sunog ro tatlong ka panimaeay nga ginapang-iyahan nanday Nimfa Cisneros, Rodel Manalo ag Anthony Cuadrante sa may Sitio Tugbungan barangay Caano, Kalibo.
Samtang, sangka bodega man it paeay ro nadaeasa it nasambit nga sunog nga ginapanag-iyahan ni Christian Oliveros.
Sandig sa imbestigasyon it Bureau of Fire Protection (BFP)-Kalibo sa pagpanguna ni Fire Inspector Carlos Magbanua nga bandang alas-7:48 kabi-e kat nakabaton ro andang taeatapan it sangka fire call kun siin pag-abot sa lugar it insidente hay mabahoe eon ro kaeayo.
Una sigon nga nakit-an ro kaeayo sa panimaeay nanday Cisneros ag ginasugid nga presenteng owa it tawo.
Sa makaron padayon ro ginapatigayon nga imbestigasyon it BFP-Kalibo sa mismong gintunaan it nasambit nga sunog.
Apang sambilog sa ginakonsidera it mga otoridad hay ro mga narekober nga battery nga ginagamit it pamilya Cisneros para sa andang iwag.
Angot kara ,partially damage man ro naangkon it nasambit nga bodega nga kun siin ginabuebanta ro kapin sa P315,000 nga inisyal nga gin-aywan nga danyos.
Samtang, 8:35 it pang-orason ag gindeklara it BFP-Kalibo nga fire out eon ro nasambit nga insidente.
