KALIBO, Aklan—Nagapadayun ro imbestigasyon it Bureau of Fire Protection ukon BFP Lezo sa natabu nga grassfire pasado alas-9 it agahon it Martes sa bakueod nga portion it Barangay Mina, Lezo.
Suno kay SFO3 Anthony dela Cruz, municipal fire marshall it BFP Numancia nga naging malisod ro andang ginpatigayon nga fire fighting kaibahan ro mga bumbero halin sa banwa it Lezo ag Malinao bangud nga naging maeapad ro pagkalhit it kaeayo sa mga cogon ag halimunon.
Ro insidente hay sa tunga it dry spell ukon grabeng tag-init nga naeksperyensiyahan sa bilog nga nasyon tuga it el nino phenomenon.
Ginpahayag ni SFO3 dela Cruz nga pasado alas-9 it agahon kat mag-umpisa nga magkalhit ro kaeayo sa mga nagaka-uga eon nga cogon ag halimunon nga sa mayad nga swerte hay owa it nadaeahig nga mga naka-gihit nga kasapatan sa lugar kat matabu ro insidente.
Ginatumod pa sigon nanda kon matuod ro napabalita nga may pilang mga unga nga gina-alegar nga nagsuga ag bangud nga uga ro mga halimunon sa lugar hay madasig nga nagkalhit ro kaeayo.
Nagbuhay it kapin sa daywang oras ro sunog antes nga eubusan nga napatay ro kaeayo it mga otoridad.
Bandang alas-10:44 kat gindeklara ro fire under control apang eubusan nga napatay ro kaeayo bandang alas-11:20 eon it agahon.
Sa pihak nga parte, padumdum ni SFO3 dela Cruz nga likawan anay ro magsuga bangud sa nailistang sunud-sunod nga insidente it grass fire sa probinsiya nga makabig nga maka alarma makaron nga paniempo.
