Posibleng maka-eksperyensiya ro Pilipinas it mas grabeng pagbag-o sa tiempo sa tunga it ginaeauman nga pagdungan it southwest monsoon ukon Habagat ag posibleng Super El Niño umpisa Hunyo hasta Agosto makaron nga dag-on, suno sa state weather bureau nga PAGASA.
Suno sa ahensiya nga may 92 porsyentong posibilidad nga magadungan ro Habagat ag sangka “very strong” ukon “Super” El Niño, nga nagatumod sa abnormal nga pag-init it temperatura it tubig sa Pacific Ocean.
Ginpahayag ni PAGASA Climate Monitoring and Prediction Section chief Ana Liza Solis nga posibleng magtuga raya it mas mabaskog nga pag-uean sa pihak it El Niño bangud sa ginpabaskog nga southwest monsoon ag posibleng pag-impluwensya it mga bagyo.
Ginpaathag nana nga sa tiempo it El Niño, nagahina ro easterlies ag pwedeng magpangibabaw ro westerlies, ag may mga kahigayunan nga naga-recurve ro mga bagyo nga nagapabaskog pa it Habagat, rason nga nagataas ro peligro it pagbaha.
Base sa kasaysayan, maskin mas sangkiri ro bagyong nagasueod sa nasyon kada El Niño, ro mga nagatama hay kaeabanan nga mas mabaskog ag nagatuga it grabeng uean ukon mabaskog nga hangin.
Suno pa kay Solis, ro “very strong” El Niño hay may kaangtanan sa pagtaas it temperatura it dagat nga masobra sa 3°C hasta 3.5°C, nga pwedeng magtuga it grabeng epekto sa klima. Ulihing naobserbahan ro makarondaya nga kondisyon hay ko dekada 1870.
Sa mga nagtaliwan nga El Niño events ko 2015, 2018–2019, ag 2023–2024, naka-eksperyensiya ro nasyon it bagyo kapareho it “Usman” nga nagtuga it maabung nagkaeamatay, kaibahan ro iba pang bagyong nagsueod sa Philippine Area of Responsibility.
Nagpaandam ro PAGASA nga pwedeng makaangkon it grabeng pag-uean nga gulpiyada ag dere-deretso rason nga importante ro magpahaum bangud sa limitasyon it mga lumang flood control systems sa maabu nga urban nga lugar.
Suno pa sa ahensya, pagkatapos it Habagat season hay pwedeng sumunod ro mabuhay nga tag-init nga ginaeauman nga pinaka-grabeng El Niño sa Oktubre hasta Disyembre, nga posibleng maka-apekto sa agrikultura ag produksyon it pagkaon.
Nagapanawagan ro PAGASA sa national ag local government nga pabaskugon ro pagpahaum ag mitigation measures bangud sa posibleng pag-tiyog it nasyon sa tunga it pagbaha ag tag-init.
