KALIBO, Aklan—Nagapabilin nga bastante ro suplay it bueak sa mga flower shop sa kahabaon it Roxas Avenue, Kalibo sa tunga it nagahilapit nga selebrasyon it Valentine’s day sa adlaw it Lunes.
Suno kay Evelyn, sangka flower vendor nga medyo may kamahaean ro presyo makaron it parehong lokal ag imported nga bueak.
Pila sigon sa ginabaligya nanda nga bueak hay ro rosas, sun flower, star gazer, carnation ag maabu nga iba pa.
Ro presyo sigon it sangka stick nga rosas hay P100 kung siin may una man sanda nga mga boquet.
Ro pinakabarato sigon nga boquet hay nagabalor it P150 nga may sueod nga sangka stick it rosas samtang ro boquet nga may tatlong stick it rosas hay nagabalor it P500.
Ro half dozen sigon it rosas nga naka-boquet hay P800 ag ro sang dosena hay P1,800.
Kaabuan sigon sa andang suplay nga rosas hay maghalin sa Baguio samtang may iba man nga halin sa ibang nasyon.
Masami sigon nga ginabakae it mga tawo sa adlaw it tagipusuon hay ro pueang rosas bangud nagasimbolo raya it madaeum nga paghigugma.
Ginpahayag pa ni Evelyn nga bukas sanda sa pagbaton it mga advance order ukon booking para sa Valentine’s day.
May mga nakapahaum sigon sanda nga boquet apang pwede man nga magpa-costumize ro mga costumer.
Nagaeaum sigon sanda nga maging madahog ro andang baligya makaron nga dag-on kasunod it paghaeuga it mga restrictions.
Ginaeauman nga magabuhos ro mga bumaeakae sa flower shops sa adlaw it Lunes, Pebrero 14.
