KALIBO, Aklan—Una eun sa “critical” status ro suplay it dugo sa probinsiya it Aklan.
Raya hay sa tunga it ginapatubang nga pandemya tuga it coronavirus disease 2019 ukon COVID-19.
Suno kay Mary Joe Galleon it Philippine Red Cross- Aklan nga mabahoe eun nga challenge para kanda makarun ro pagtao it euwas nga dugo para sa mga pasyenteng nagakinahangean kara.
Raya hay matapos ro kalisod na naekperyensiyahan it taeatapan sa pag-usoy it stock it dugo nga nagaka-angay sa kinahangean it pasyente bangud eun man sa waea tuo nga kanselasyon it mga indibidwal ukon grupo nga nagadonar it dugo sa nakaangdan nga blood letting activities.
May kaangtanan kara, uman nga nagpanawagan ro Philippine Red cross aklan sa publiko nga magdonar it dugo agud nga maitao man ro suplay nga kinahangean it mga pasyente.
Samtang, gina-engganyo man ro mga naga-avail it dugo nga magdaea it andang kaugalingon nga donor agud nga mabayluhan ro suplay nga andang nagamit.
Samtang, ginpasiguro man it taeatapan ro hugot nga pagsunod sa ginapatuman nga health and safety protocol samtang nagapatigayon it bloot letting activity agud nga malikawan ro pagtaeapnan it deadly virus nga covid-19.
Dugang pa kara nga euwas ag indi dapat nga mahadlok ro mga gustong magdonar it andang dugo bangud mag-euwas sa covid-19 hay maabo pang masakit nga kinahangean nga tutukan ag maabo sa mga raya hay nagakinahangean gid it blood transfusion.
