Gintalakay sa natungdan nga komitiba it Sangguniang Bayan it Batan ro angot sa proposed resolution ni SB member Eric Del Rosario nga pasugtan ro Metro Kalibo Water District nga sudlon ro mga barangay it banwa para sa maayos ag tayuyon nga supply it tubi.
Suno kay Del Rosario, sa pinaagi it raya nga tikang hay mabuhinan ro kalisod it mga pumueoyo ag masiguro ro pangmabuhayan nga supply it malimpyong tubi sa andang lugar. Kon magkasugot sa plenaryo, igapasaka ro plano sa Local Water Utilities Administration (LWUA) para maumpisahan ro nasambit nga proyekto.
Ginpahayag dugang nga pwede eon maka-tap sa MKWD ro mga barangay it Bay-ang, Magpag-ong, Cabugao ag Lalab agud nga mataw-an it katumanan ro handom it mga pumueoyo nga makaangkon it tayuyon nga supply it tubi direkta sa andang mga saeoran.
Nasayuran nga maabong dinag-on eon nga ginadumaeahan it LGU-Batan ro water system project kon sa siin milyon ro pondo nga ginataeana kara ag bukon gihapon it bastante ro nagaabot nga supply it tubi sa mga kabaeayan.
Bangud kara, gin-enngganyo ni Del Rosario ro Committee on Infrastructure ag Oversight Committee nga magtibyog agud nga mausuyan it solusyon ro problema sa suplay it tubi sa banwa it Batan.
