Si President-elect Bongbong Marcos ro magiging temporaryo nga Agriculture secretary.
Suno kana, pagatutukan nana ro departamento agud nga maangkon ro ginahandum nga food security.
Kinahangean sigon nga mare-organisa.
Grabe suno kana ro problema sa departamento.
Ro pagpungko ni BBM sa DA hay ensakto sa naka-abang nga krisis sa pagkaon bukon eamang sa Pilipinas kundi sa bilog nga kalibutan.
Nagpaandam eon ro World Bank, World Trade Organization, Food and Agricultural Organization of the United Nations ag World Food Program angot sa paga-atubangon nga food crisis.
Raya hay tuga it nagapanaeasa nga pandemya ag ro nagakatabu nga kinagamo sa Ukraine matapos nga salakayon it Russia ko Pebrero.
Mas apektado it food crisis ro maisot ag mga pigadong nasyon kapareho it Pilipinas.
Kaeabanan nga ro mga pigado nga nasyon ro naga import it andang mga nagapangunang kinahangeanon.
Indi mabuhi ro mga maisot nga nasyon kundi indi maga import eabi eon it pagkaon.
Ro Pilipinas hay nakadepende eon sa pag-import it mga nagapangunang produkto kapareho it bugas, asukar, isda, karne ag pati mga tinuea.
Bangud nga nasanay eon sa pirmeng pag import, ro kaugalingon nga produkto hay napabay-an.
Kilaea nga agrikultural nga nasyon ro Pilipinas apang kon mag import it bugas hay tone-tonelada.
Makahueuya nga maeapad ro taeamnan it paeay apang ro ginakaon hay humay nga produce it mga mangungumang Chinese, Vietnamese ag Thais.
Meapad man ro kaeawram it Pilipinas apang pati galunggong, gina-import.
Maangkon ro ginahandum nga kaabuon it ani kun pagasuportahan ro mga mangunguma.
Raya man ro pamaagi agud nga indi eon mag import.
Itodo ro bulig agud nga mapa-umwad ro kaugalingon nga agrikultura ag produktong Pilipino ro nakapahaum sa lamesa.
