KALIBO, Aklan—Ginbo-oe eon ro surgical lockdown sa Zone 5 it Barangay Manocmanoc sa isla it Boracay umpisa alas 8:00 kaina it agahon.
Sa pihak kara, ginpadumdum it lokal nga gobyerno it Malay nga maskin nga ginhaeugaan eon ag uman nga ginbalik sa Modified General Community Quarantine ro andang quarantine classification hay nagapabilin nga bawae ro operasyon it mga bars, restaurants ag food parks nga may live shows ag music.
Limitado man sa andang restaurant services ro mga restobars.
Mag eowas kara, owa man gihapon ginapasugtan ro bueang ag operasyon it mga bueangan kamana man ro non-essential gatherings kapareho it mga parties ag selebrasyon.
Nagapabilin ro curfew hours umpisa alas 11:00 it gabi-i hasta alas 4:00 it aga-aga.
Obligado gihapon ro tanan nga magsuksok it face masks ag face shield sa tanan nga oras samtang sa guwa.
Ginapasugtan man ro religious gatherings basta masigurado nga ro seating capacity it simbahan hay limitado eamang sa 30%.
Nag apela man ro mga opisyal sa isla nga seryosohon ro pagsunod sa minimum public health standards para sa kaeowasan it tanan.
Sa makaron ro banwa it Malay ag isla it Boracay hay may kabilugan nga 331 nga kaso it COVID-19 matapos nga makaangkon it daywang dugang nga kumpirmadong kaso.
Nag-abot sa 39 ro aktibong kaso samtang 290 ro nagmayad matapos nga madugangan it 8 nga bag-ong recoveries.
