KALIBO, Aklan–Matapos makalista it mga kaso it COVID-19, uman nga ginpaidaeum sa surgical lockdown it Lokal nga gobyerno it Malay ro Zone 5 ag 6 it Barangay Balabag sa isla it Boracay.
Suno kay Malay Mayor Frolibar Bautista nga sandig sa rekomendasyon it Malay IATF Against COVID-19 ag IMT hay gin-isyu kara ro Executive Order No. 021 kung siin ginbutang ro daywang Zone sa mas hugot nga restrictions.
Ginpahayag pa kara nga nakadepende sa covid-19 cases kung hasta san-o magabuhay ro Surgical Lockdown sa lugar ag magatao eamang sanda it Quarantine Passes sa mga apektadong residente.
Sa makarun suno pa kana hay nagabueoligan ro mga tawuhan it PNP Malay, PNP Maritime, Malay Auxiliary Police, Balabag Barangay Tanod, Philippine Navy, Philippine Army, Bureau of Fire Protection, Beach Guards, ag LGU Securities para masigurong nagasunod ro mga raya.
Mag-euwas sa APOR, owa eun it ginapasugtan pang magguwa sa andang panimaeay ag owa man it makasueod pa maghalin sa guwa it apektadong lugar.
Samtang ro contact tracing hay padayun man nga ginahimo it Municipal Health Office it LGU Malay para matumod ro tanan nga may close contacts sa mga bag-ong confirmed cases.
Magatao man it unang distribution it ayuda ro Municipal Social Welfare and Development Office it LGU-Malay para sa mga naapektuhan it lockdown.
