BANGA, Aklan—Uman nga ginpamalibaran it suspek nga si Jerick Ocampo Ramirez nga ginhimuslan nana ro 17 anyos nga dalagita sa banwa it Tangalan ko Enero 29, 2025.
Sa interview it Bombo Radyo, aminado imaw nga nag-away sanda it babaye matapos nga gulpi raya nga nagtawag sa anang nobyo samtang nga naga-warang sanda sa Baloga Hills sa Brgy. Tagas sa nasambit nga banwa.
Suno kana nga nakataeana kunta nana nga sueangon ro babaye sa aklan paagto it Mindoro matapos nga mabaton imaw sa anang gin aplayan nga trabaho sa bakery it anang kakilaea .
Madumduman nga ginsaysay it dalagita nga may nakita imaw nga job hiring sa social media nga nagakinahangean it babaye nga tindera sa bakery.
Bangud nga interesado hay nakipagkita imaw sa suspek nga nagbiyahe paagto it Aklan.
Matapos nga himuslan hay gin-eu-ok sigon imaw ag ginhuoeg sa bangin, apang maswerteng nabuhi at nakasugid sa mga otoridad.
Pinaagi sa gintingob nga pwersa it Tangalan, Banga ag Kalibo Municipal Police Station hay nadakpan ro suspek sa entrapment operation.
Ginasugid nga matapos nga himuslan ro dalagita hay gintakaw pa kara ro anang cellphone ag ginhana nga ibaligya pinaagi sa social media.
Ro mismong hepe it Tangalan MPS ro nagpakuno-kuno nga buyer ag makataliwan ro ap-at nga adlaw nga transaksyon hay nagkasugot nga magakita rason nga natigayon imaw nga maaresto .
Narekober kay Mercado ro cellphone it biktima, P2,000 nga gingamit sa pagbakae it gadget ag sangka kalibre it baril nga kargado it limang bala nga ginpamalibaran man nana nga imaw ro nagapanag-iya.
Gin-insister pa kara nga chatmate nana ro babaye rason nga nag-meet-up sanda.
