BALITANG Espesyal — Aminado ro sangka 45-anyos nga eaeaki sa Indonesia sa pagpatay sa anang 60-anyos nga kaeapitbaeay matapos nga ma-offend ag makulitan sa pagpinangutana it biktima kun ham-an nga owa gihapon ginakasae ro suspek.
Ro insidente hay natabu sa South Tapanuli regency nga makit-an sa North Sumatra.
Ginkilaea ro biktima nga sangka retiradong civil servant nga nakilaea kay Asgim Irianto.
Base sa panaysayon it asawa it biktima, nag-abot ro suspek nga si Parlindungan Siregar sa andang baeay bandang alas-8 it gabi-i nga may bitbit nga sangka kahoy ag gin-atake ro anang mister nga owa it anuman nga warning.
Nagdaeagan paguwa sa kalye si Asgim, kun sa siin hay gin-eagas pa imaw ni Parlindungan ag ginhampak it kahoy sa ueo rason it anang pagkatumba.
Owa pa sigon nakuntento ro suspek ag ginbugbog ro biktima hasta nga namatay.
Pilang residente ro nagpatunga ag gindaea ro biktima sa ospital, apang gindeklara nga dead on arrival.
Gin-aresto it kapulisan si Parlindungan sa sueod it haeos sang oras nga pag-usoy.
Pahayag it suspek sa mga pulis nga determinado gid man imaw nga bugbugon ro biktima hasta nga mamatay bangud nga maskin nga nasayuran nana nga “joke”, apang napikon eon sigon imaw ag nasakitan sa pirme kara nga pagpangutana kana kon ham-an nga nagapabilin imaw nga single.
