KALIBO, Aklan–Presenteng naka-hospital arrest sa Aklan Provincial Hospital ro 74-anyos nga suspek nga nagpang-eabo sa anang kasimaryo ko nagtaliwan nga adlaw sa Brgy. Morales, Balete.
Suno kay Police Senior Master Sergeant Francisco Sison, imbestigador it Balete Municipal Police Station nga ginpasaka eon nanda ro kasong frustrated murder kontra sa suspek nga si Berito Morales, 66-anyos nga may piyansang kapin sa P200,000.
Raya hay matapos ro pag-eabo it suspek sa biktima nga si Winifredo Quinesio, residente it nasambit nga lugar.
Nag-ugat ro insidente matapos nga ginbuoe it biktima ro lambat nga gin-ubra nga pang harang it suspek sa eanas.
Ginapahayag nga samtang nagahugas sa bubon ro biktima hay gulpi eamang imaw nga gin-eabo it suspek nga nagtuga it pilang lastro sa anang eawas.
Nahimo man nga makabaeos it biktima pinaagi sa paghandos kara it pala kung siin tinamaan sa ilong ag eawas ro suspek.
Ro daywa hay parehong gindaea sa ospital para sa nagakaigo nga pagbueong.
Sa oras nga makaguwa sa ospital, nakataeana nga pagadaehon ro suspek sa Aklan Rehabilitation Center (ARC) para sa nagakaigo nga disposisyon.
