KALIBO, Aklan – – – Dakop sa entrapment operation ro sangka 25 anyos nga eaeaki matapos nga gina-alegar nga may buyot nga sex video it magpartner nga natabu sa pampublikong lugar sa barangay Jawili, Tangalan.
Naaresto ro suspek nga si Jayson Castillo, it Barangay Bugtong-Bato, Ibajay sa gintingob nga operasyong ginkasa it Ibajay MPS ag Tangalan MPS.
Ginasugid nga samtang nagapatigayon it pakikipaghieawas sa kada isaea ro parehong 18 anyos nga magpartner sa sangka garden kung siin makabig nga pampublikong lugar hay live raya nga ginabue-an man it video it suspek.
Owa sigon nakasayud ro daywa nga may tawo nga nagabuoe kanda it video samtang nagapatigayon sanda it intimate moment.
Apang, ku ulihi hay nataeupangdan man it daywa nga medyu may ibang tawo nga nagapamataw kanda.
Gin-eagas man sigon raya it daywa ka magpartner ag gin-ayu nga paea-on ro nasambitang video kabaylo it kwarta.
Apang nagpamalibad ro suspek nga paea-on raya ag ginbarter sa daywa nga magapasugot eamang imaw nga paea-on kung makipaghieawas man kana ro babaye sa kapareho man nga lugar kung siin nanda ginhimu it anang partner.
Bangod kara hay nagdangop ro magpartner sa Ibajay PNP station kung siin padayun sa makaron nga gina imbestigahan it nasambitang taeatapan ro insidente.
