KALIBO, Aklan—Boluntaryo nga nagsurender sa Kalibo municipal police station ro 25 anyos nga eaeaki matapos nga bun-on ro naka-alitan sa idaeum it lumang tulay bandang alas-10:00 kabi-i.
Suno sa suspek nga si Janjan Colas, tumandok it Barangay Dalagsaan, Libacao ag presenteng naga-istar sa Oyo torong St. Kalibo nga nagdesisyon imaw nga magsurender matapos nga tub-eagon it konsensiya sa ginhimo nga krimen.
Ginsaysay kara nga matapos nga makipag inuman sa Purok 3 C. Laserna St. Kalibo hay nagdesisyon imaw nga mag-uli eon.
Apang pag abot sa lugar nga gin eontaran it krimen hay nakasub-eang nana ro biktimang si Romel Aros.
Sa owa ginaeauman hay ginpil-an sigon imaw ag ginbayo sa anang ueo nga naging rason it anang kaakig.
Napikon suno kana imaw rason nga nagbo-oe it siyaw ag ginbuno ro biktima it makapilang beses.
Aminado man ro suspek nga bukon nana personal nga kakilaea ro biktima.
Nasayuran nga nakadaeagan pa ro biktima antes nga natumba sa katung-anan it purok 4 ag 5 nga ginkabuligan it mga residente ag kapulisan nga madaea sa ospital apang namatay samtang ginabueong.
Sa makaron hay sa paghinakop eon it Kalibo PNP ro suspek ag magapangatubang sa nagakaigo nga kaso.
