KALIBO, Aklan—Nakakulong eon makaron sa Altavas Municipal Police Station ro suspek sa pagpamuno sa sangka police officer nga naassign sa Aklan Police Provincial Office ukon APPO.
Suno kay PSSgt. Jane Vega, tagapaghambae it Aklan PPO nga insigida man nga naaresto ro suspek nga si Rex Perlas, 36-anyos it Brgy. Man-up, Altavas matapos nga nabun-an kara it makapilang beses ro pulis nga si PSSgt. Edmar Aranas, 34-anyos it Brgy. Old Buswang, Kalibo.
Ginpahayag ni Vega nga off duty si Aranas kat natabo ro insidente kon siin ro gintunaan kara hay kat naakig ro suspek matapos nga natamaan it air gun it onga nga uwa man nahungda.
Nagpatunga si Aranas agud nga pakalmahon ro suspek bangud nga una raya sa idaeom it impluwensya it aeak.
Nakauli eon sigon si Perlas apang bumalik ag naagaw it uman ro air gun kay Aranas daea handos it siyaw sa eawas it pulis.
Nakaangkon raya it lastro ag gilayon man nga nadaea sa ospital iya sa banwa it Kalibo kon siin imaw sa makaron nagapabilin nga naka-confine para sa anang nagakaigong pagbueong.
Samtang, si Perlas hay nakataeana eon man nga pasakaan it nagakaigong kaso.
