KALIBO, Aklan—Boluntaryo nga nagsurender kay Kalibo mayor Juris Sucro ro suspek nga ginaturo nga nagpamana sa daywang ka eaeaki ko nagtaliwan nga Mayo 7 it gabi-i sa Purok 4, C. Laserna St. Kalibo.
Ro suspek nga nakilaea kay Geo Cuales, owa it asawa ag residente it Purok 6 C. Laserna St. Kalibo hay gintumod it mga nakasaksi sa krimen.
Imaw hay may dati nga mga kasong frustrated homicide ag robbery ag natigayon nga makulong.
Depensa nana nga mistaken identity ro natabu bangud nga may iba imaw nga gina target nga anang naka-away sa social media nga nagapakahuya kana ag sa anang pamilya ag gusto nana nga makabaeos.
Madumduman nga daywa ro inigo it anang pagpamana kun sa siin ro sambilog hay nakaangkon it daplis sa leog ag ro sambilog hay sa anang tuhod.
Sambilog sa mga biktima nga si Chris Mar Sabay, 14 anyos, residente it Purok 4 C Laserna St. hay nagpaabot it reklamo sa Kalibo PNP.
Natabu ro insidente ko Mayo 7 bandang alas 8:30 it gabi-i samtang ro biktima hay nagatindog ag nagahueat it anang order nga pancit canton sa sangka baraka sa Artesian sa Purok 2 sa nasambit nga lugar.
Gulpi eamang nga may nag agi nga motorsiklo sakay ro suspek ag ginpana ro mga biktima.
Pursigido man ro nanay it menor de edad nga magpasaka it kaso agud nga mataw-an it leksyon ro suspek.
Samtang, ginpasiguro man ni mayor Sucro nga indi eon matabu it uman ro kaparehong insidente.
Mas nga pagahugtan ro police visibility ag curfew sa mga minors agud nga matapna ro mga gang wars.
Haum man sigon ro suspek nga atubangon ro anuman nga kaso nga igapasaka kontra kana.
