Ginpaidaeom sa inquest proceedings sa Aklan prosecutor’s office ro suspek nga responsable sa pag-embaring sa L300 van samtang nagabyahe sa national highway nga sakop it Brgy. Tulingon, Nabas.
Suno kay PSSgt. Lu Dela Cruz, imbestigador it Nabas Municipal Police Station nga nagapangatubang makaron sa kasong serious physical injury, slight physical injury ag malicious mischief nga may pyansang nagaabot sa P48,000 pesos ro suspek nga si Julius Illiado, 22-anyos ag tumandok it Libertad, Nabas.
Sa imbestigasyon it pulisya, tinamaan ro van sa waea nga parte it bintana kon siin nakit-an sa idaeom it bangko ro baton nga kapin sa daywang inumok it bahoe ag maeapad.
Raya ro nakaigo sa dahi it biktimang si Mary Jane Plaza, 23-anyos it Sitio Lugutan, Brgy. Manocmanoc sa isla Boracay ag sa sambilog pang biktima apang matapos nga gin-eapatan it medikasyon hay gilayon man nga ginrefer sa out patient department it Motag district hospital sa banwa it Malay.
Samtang, si Mary Jane hay ginrefer sa banwa it Kalibo para sa madaliang operasyon bangud nga naapektuhan ro anang utok kat naggiltak ro anang bungo.
Sa makaron suno kay PSSgt. Dela Cruz hay ginahueat pa nanda ro resolusyon maghalin sa korte para sa nagakaigong disposisyon it suspek.
Samtang sa pihak nga parte, mabahoe makaron ro pagnueo ni Illiado matapos nga sangkiri eon lang imaw nakapatay it tawo bangud sa anang kahilungon.
Uwa sigon imaw it intensyon nga makandato ro matabo ag uwa man imaw it kaaway sa daean.
Gusto eamang nana nga magpautwas sa anang baeatyagon matapos nga nakaangkon it uwa pagkaintindihan sa anang asawa.
