Igapaidaeom sa inquest proceedings makaron nga adlaw it Sabado sa Aklan prosecutor’s office si Mark Archie Torrefeil, 31-anyos ag presenteng naga-istar sa Brgy. Cajilo, Makato sa kasong Robbery with Homicide.
Si Torrefeil ro nagapangunang suspek sa brutal nga kamatayon ni Bonna Hercia Ambay, 23-anyos it Brgy. Nauring, Pandan, Antique ag nagatrabaho bilang manager-reliever it RD pawnshop sa may Mabini St. Kalibo branch.
Nauna eon nga ginkumpirma ni PLt. Abdon De Mateo nga pagpanaog sa eroplano it suspek hay diretso eagi raya nga ginsakay sa patrol car it Kalibo PNP ag ginderetso sa taeatapan it pulisya kon siin imaw temporaryong ginkulong.
Ginklaro ni PLt. De Mateo nga preparado eon ro tanan nga dokumento sa piskalya apang nadelay ro pag-abot ni Torrefeil rason nga uwa raya nahingabot kahapon nga adlaw it Biyernes.
