KALIBO, Aklan—Ginpaguwa eon it Philippine National Police ro inisyal nga resulta it ginpatigayon nga autopsy sa bangkay it pinatay nga manager-reliever it RD Pawnshop Mabini St. Kalibo Branch nga si Bonna Hercia Ambay.
Suno kay Atty. Benjamin Candari Jr. , lolo it biktima ag abogado it pamilya ambay, nagaguwa sa autopsy nga owa it indikasyon it sexual abuse ukon owa naabusahan sekswal si Hercia.
Nag-angkon sigon raya it 18 nga igo it pagbuno sa nagkaeain-eain nga parte it anang eawas kun sa siin ro ap-at kara hay makabig nga patal.
Nagapati man si Atty. Candari nga robbery ukon pagpanakaw ro tuyo it suspek nga si Mark Archie Torrefiel.Bangud nga owa it death penalty sa nasyon, igaduso nanda nga hasta nagakabuhi nga pagka-presu ro igagapapanog sa suspek sa brutal nga pagpatay sa biktima.
Ro kaso suno kana nga igapasaka hay nakadepende sa mga ebidensiyang natipon.
Madumduman nga gindaea ag ginkulong sa kampo krame ro suspek nga si Torrefiel matapos nga madakpan it mga otoridad sa ginkasa nga hot pursuit operation sa pagpanguna ni PMaj. Jason Belceña , hepe it kalibo municipal police station.
Nakataeana raya nga pagasueangan it mga katapo it kalibo PNP agud nga daehon iya sa banwa it kalibo sa pagpasaka it nagakaigo nga kaso kontra kana.
