KALIBO, Aklan—Ginsaylo eon sa Bureau of Jail Management and Penology ukon BJMP-Aklan sa Brgy. Nalook, Kalibo si Mark Archie Torrefiel, 31 anyos, ag presenteng naga-istar sa Brgy. Cajilo, Makato ro ginaturo nga killer it pawnshop manager-reliever.
Raya hay matapos nga mabaton it pamunuan it Kalibo municipal police station ro commitment order halin sa korte para maisaylo raya it presuhan.
Nauna eon nga ginpaidaeum ro akusado sa swab test ko Lunes nga adlaw kung siin negatibo ro naging resulta.
Angot kara, ginpasiguro ni SJO3 Richard Quiosy, supervisor it BJMP-Aklan ro seguridad ni Torrefiel sa sueod it presuhan.
Madumduman nga si Torrefiel ro ginaturo nga suspek sa brutal nga pagpatay kay Bonna Hercia Ambay, 23-anyos, reliever-manager it RD Pawnshop-Mabini Street, Kalibo branch ag residente it Brgy. Nauring, Pandan, Antique ko nagtaliwan nga Dominggo.
Hunyo 11, ginpaidaeum si Torrefiel sa inquest proceedings sa kasong Robbery with Homicide sa Office of the Provincial Prosecutor.
Ro warrantless arrest sa akusado hay resulta it sigidas nga ginpatigayon nga manhunt operation it mga otoridad.
Madumduman nga naaresto raya sa Barangay Pinagbuhatan sa Pasig City ko Hunyo 9, ukon ap-at nga adlaw pagkatapos it krimen.
Ro empleyada hay nag angkon it 18 nga igo it pagbuno sa nagkaeain-eain nga parte it anang eawas nga naging rason it anang hinali nga kamatayon.
