KALIBO, Aklan—Posibleng magapangatubang sa kasong homicide ro security guard matapos nga tumuron bilang person of interest sa brutal nga pagpatay sa branch manager it sangka pawnshop nga may branch sa Mabini St. Kalibo.
Sa ginpatigayon nga press conference it Kalibo municipal police station, ginpahayag ni P/Lt. Aubrey Ayon, deputy chief of police nga raya hay andang gin base sa forensic investigation ukon pagtipon ag pag-analisar it mga physical evidence sa crime scene rason nga naka-conclude nga imaw ro suspek.
Nasayuran nga nasapwan nga nagapaligos sa anang kaugalingon nga dugo ro biktimang si Bonna Hercia Ambay, reliever manager it RD Pawnshop mabini branch ag ro person of interest hay ro naka-duty nga gwardiya nga si Mark Archie Torrefiel.
Sa makaron hay padayun nga ginatugis it mga otoridad ro nagpaeagiw nga si Torrefiel.
Kaibahan sa narekober sa crime scene it mga operatiba it SOCO-Aklan hay ro uniform it security guard nga may name tag nga Torrefiel kamana man ro kutsilyo nga ginadudahan nga gingamit sa krimen.
Nag angkon ro biktima it napueo nga stub wounds.
Samtang, ginkumpirma man it pulisya nga nakapanaog ro eambong it biktima kat maabutan it SOCO kamana man nga nakabukas ro vault ag mga drawer.
Nag apela man ro mga otoridad nga likawan anay ro mga espekulasyon nga ginhimuslan ro biktima bangud nga owa pa nagguwa ro resulta it autopsy nga nakataena sa Miyerkoles nga adlaw.
Sa pihak kara, ginpasiguro it Kalibo PNP nga may lead eon sanda nga ginasundan apang indi pa nanda mabulgar ro detalye sa makaron.
Gindugang pa ni Lt. Ayon nga ginabantayan nanda makaron kon ma-rekober ro mga data it CCTV footage sa sueod it pawnshop.
Raya hay matapos nga makaangkon it glitches apang padayun pa nga gina-trouble shoot it mga IT Experts it kompaniya nga halin sa siyudad it Roxas City.
