KALIBO, Aklan–Ginpasakaan eon it nagakaigo nga kaso sa Aklan Provincial Prosecutor’s Office si Mark Archie Torrefiel, sangka security guard ag nagapangunang suspek sa pagpatay sa pawnshop manager-reliever nga si Bonna Hercia Ambay.
Gindaea it mga tawuhan it kalibo municipal police station sa prosecutors office si Torrefiel agud nga mag-atubang sa inquest kun sa siin ginpasakaan imaw it kasong robbery with homicide.
Ro inquest proceedings hay gintambungan it mga opisyal it kalibo PNP, ama it biktima nga si bonifacio ambay ag ibang katrabaho it biktima sa RD pawnshop.
Maabu nga mga kapulisan ro nakakalhit sa lugar kamana man nga nakasuksok it bullet proof vest ro suspek ag mga naga-escort kana.
Uman raya nga ginbalik ag ginkulong sa lock-up cell it kalibo pnp nga makaron hay naka-padlock bangud sa gina-alegar nga nababaton nga mga death threat it suspek.
Sa Lunes, ginaeauman nga iga-remit raya sa bureau of jail management and penology ukon BJMP-Aklan.
Madumduman nga biyernes nga adlaw, bandang alas-4:45 it hapon, nag-abot sa kalibo international airport ro suspek kaibahan si P/Maj. Jasson Belciña, OIC chief of police it Kalibo PNP, kaibahan ro andang Intelligence Operatives ag iba pang mga opisyal.
Bandang alas-5:08 it hapon, halin sa airport, direkta imaw nga gindaea sa Kalibo PNP para sa safekeeping ag temporary custody.
Hunyo 6 kat masapwan nga nagapaligos sa kaugalingon nga dugo ro biktima sa sueod it anang ginatrabahuhan sa RD pawnshop nga nahamtang sa Mabini St., Kalibo.
Samtang, napuno it emosyon ro komprontasyon sa tunga it ama nga si bonifacio ambay ag ko suspek sa lock up cell it kalibo pnp.
Ginkwestiyon nana kon ham-an nga naobra sa anang unga ro krimen nga nagapangabuhi ag nagatrabaho it malinong.
Ginpamukha man kara sa suspek ro gin-obra nga makangieidlis nga pagpatay sa anang unga.
Owa man napugngan ni bonna fe ambay, magueang it biktima nga makatangis it todo kat makakita it personal ro suspek.
